ايجي سبورت - كشف الفنان حسان العربي سر غيابه عن الساحة الفنية خلال الفترة الماضية، وأكد الفنان أن هناك مجموعة كبرى من الفنانين يعانون من نفس الأزمة، بسبب اقتصار العمل على مجموعة معينة من الفنانين.

تصريحات حسان العربي 

وقال الفنان حسان العربي خلال حلوله ضيفًا على برنامج بنظرة تانية الذي يقدمه الإعلامي محمود الجلفي، على قناة الشمس وفقا لما رصده موقع تحيا مصر، إن الوسط الفني أصبح به خلل وهناك فجوة كبيرة بين المخرجين والفنانين القدامى ولا يوجد نقطة اتصال تجمع بينهما.

واستكمل حسان العربي: المخرجين دلوقتي ميعرفوناش ومفيش بينا تواصل وبيعتمدوا على مجموعة معينة، وكتير من الفنانين القدام غابوا عن الساحة الفنية.

حسان العربي: بزعل أما حد يقولي انت اعتزلت؟ 

وأكد أن الأمر يسبب له عناء نفسي كبير، قائلاً: بزعل أوي لما انزل الشارع وحد يشوفني ويقولي أنت فين يا أستاذ أنت اعتزلت ولا إيه؟، ودة بيأثر في نفسيتي أوي والناس تقولي إن شاء الله هنشوفلك حاجة بقول أيوة وهو مفيش أصلًا، بس علشان متكسفش، وبيجي لي شغل من وسط 70 مسلسل مشهد واحد ومش مفيد أدبيًا أو فنيًا.

وأضاف حسان العربي: أحيانًا كنت بقبل أعمال فنية مشاهد صغيرة، ومكنش يليق بيا لكن قبلته علشان الفلوس، وأصلًا الفلوس مش بتكفي، زمان كنت بشتغل في 25 حلقة دلوقتي بنعمل مشهد أو أتنين، حاليًا علشان تتقدر ماديًا لازم تقدم عمل فني كبير، وأنا كنت رافض المشاركة مع حسن الرداد لأن الدور صغير جدًا، لكنهم كانوا مصممين، ولما قريت الورق الحكاية عجبتني علشان كدة قررت أشارك.

حسان العربي يتحدث عن موقف إنساني لـ أشرف عبد الباقي 

وعن أزمته الصحية ووقوف أشرف عبد الباقي إلى جانبه، قال حسان العربي: داخل أعمل منظار عادي على المعدة لما لقيت نفسي تعبان  وبخس بشكل كبير فقولت أطمن ولما رحت صوروني وكتبوا على الفيس، المواقع كلها بدأت تقول دة تعبان وفي النهاية الموضوع الحمد لله طلع بسيط.

وعن أول الفنانين الذين تواصلوا معه للاطمئنان على حالته الصحية، أكد أن أشرف عبدالباقي تواصل به على الفور، وأخبره أنه بمكان قريب منه وسيأتي للاطمئنان عليه وتقديم الدعم المطلوب: أشرف عبد الباقي أول واحد كلمني لما عملت العملية، ولما اتصل قولتله الوضع بسيط وأنا كويس الناس بس كبرت الموضوع متقلقش.

وأوضح حسان العربي أن الفنان أحمد بدير يتواصل به بشكل دائم وبينهم صداقة قوية، وجمعهما العديد من المواقف، حيث قال: أحمد بدير راجل جدع ولو حصلي أي حاجة اول واحد هكلمه هو أحمد بدير.